ALFA TV - Свет - Чешката полиција масовно ги прислушува мобилните телефони

Свет

Share |

Чешката полиција масовно ги прислушува мобилните телефони

четврток, 11 март 2010, 10:24

Чешки пратеници најавија дека ќе поднесат иницијатива до чешкиот Уставен суд за укинување на Законот кој го регулира прислушувањето на мобилните телефони од страна на полицијата, поради сомневање дека полициските службеници го злоупотребуваат Законот кој првично беше донесен за да помогне во борбата против тероризмот.

Чешката полиција дневно испраќа дури 500 барања до мобилните оператори во кои бара детални информации за разговорите, текстуалните СМС пораки како и локацијата на нивните клиенти. Годишно оваа бројка изнесува над 100.000 барања.

Самите законодавци признаваат дека барањето е парадоксално бидејќи тие самите го одобрија Законот пред неколку години и дури додадоа одредба со која се предвидува државата на мобилните оператори за мониторингот да им плаќа десетици милиони круни (10 милиони круни = 385.000 евра, јави МИА.

Донесувањето на Законот кој го регулира снимањето на телефонските разговори преку мобилните телефони со обврска за чување на податоците најмалку шест месеци, па дури и контрола на интернетскиот сообраќај на одделни клиенти, Чешка ја направи по препорака на Европската Унија.

- По две години оценувме дека тоа не функционира како борба против тероризмот туку како шпионирање на граѓаните, изјави пратеникот на чешките граѓански демократи (ОДС), Марек Бенда.
Официјалните лица на чешката полиција не сакаат да ги коментираат одделните прислушувања, но не кријат дека таквата можност им одговара.

- Податоците за телекомуникацискиот сообраќај ни помагаат во иследувањето на криминалните активности и тие ни се од голема корист, изјави портпаролката на чешката криминална полиција, Павла Копецка.